Suid-Afrika kry binnekort 'n twaalfde amptelike taal.
Die Parlement het Dinsdag 'n wysigingswetsontwerp aanvaar wat bepaal dat Suid-Afrikaanse gebaretaal die status van 'n amptelike taal gaan kry.
Die Pan-Suid-Afrikaanse Taalraad sê dié besluit baan die weg vir beter taalregte vir mense wat doof of hardhorend is.
Hulle sê dit sal ook groter bewusmaking skep dat Suid-Afrikaanse gebaretaal 'n inheemse taal is met sy eie unieke grammatika en woordeskat.
Die Nasionale Instituut vir Dowes het ook hul vreugde oor die besluit te kenne gegee.